Veröffentlicht 2 Biträäg

Haydi Rocks Remastered isch ändli da!

Vor zimli genau emene Jaar han i äs sälber produziärts Album online gschtellt. Eigently ä zimlichi egozäntrischi Sach. Ich han alles usser dä Drums sälber gschpilt beziähigswiis gsunge, und mit mim eigene ehnder bescheidene Equipment uufgnaa.

D’Reaktione druff sind gröschteteils positiv gsy, en Börner isch das Ding aber nöd unbedingt worde. Äs isch au einiges a konstruktiver Kritik vo verschiedene Lüt cho. Halt wäg de bescheidene Abmischigsqualität und au, dass es irgendwiä rumpelpumpelmässig tönt. Das nimi ärnscht.

Und natürli au Kritik a Songtäggscht, mit Schwizerdütsch bisch ja voll i de Schussliniä will’s eifach all irgendwiä verschtönd, sogar d’Schwabe. Kritikpunkt Belanglosigkeit. Sorry, dass nimi weniger ärnscht. Ich bin definiv nöd de Missionar vo irgendere Partei oder politische Bewegig. Ich beobachte eifach Sache im Alltag und verzelle voll oder mindeschtens fasch voll glogeni Gschichtli. Au wänn me s’einte oder anders politisch uuslege chönnt, das isch nöd mini Bauschtell.

Haydi lächelnd
Da luäg i aber nett

Chömed mer zur Kritik woni ärnscht gna ha:

Ich han de erschti Release wider vom Netz obenabe gnoh, will i de Meinig bin, dass es au besser gaat.

D’Songs vo dänn hani teilwiis neu gmischt und alli remastered dass es wenigschtens äs bitzli aagnähmer tönt.

Achtig Schprachwächsu!

Zuäsätzlech si jez 5! neue Liäder aus Bonustracks! uff däm Aubum. 4 dervo si nümm i mim Zürichuderwäusch wo eigetlech öppis zwüsche Züri u em Aargau isch u vom Ätti här chunt. Mis Müätti hett gäng bärndütsch gredt, i ha das aber siner Zit auä gleitig müässe vergässe, wüu sech s’Züri au drüber foutiert hei. Drum hets jez o bärndütschi Liäder. Diä si zwar o nid schprachlech perfekt, aber s’geit emu cheibe ring zum Teggschte u Singe. I hoffe, s’gfaut nech.

Schprachwächsel!

Ich mache aber witerhi au züritütschi Liäder, oder hey? Tschäggsches!

Schprachwächsu!

Pünktlech zum Tag vo dä Gränzöffnig am 15. Juni isch dä Re Release jez uff (faschd) aune Streamingdiänschte verfüägbar.

We dir scho än Äpp zum Musiglose heit, chöit der diä jetz bruche. I bi uff Spotify, iTunes, Apple Music, Deezer, Youtube Music, Soundcloud, Mx3 u de Meischte andere. Luägsch zum Bischpiu uff diä soziale Links ganz unde.

Das wärs de für de Momänt.

I ha na vüu Projäkt oder Idee im Hingerschtübli u drum git’s hiä baud wider Neuigkeite. We öpper mau gärn mit mir öpis aateigge u düreziä wett cha sie oder är sech gärn bi mer mäude. Wes de nid am früäche Morge isch bini geng offe für neus Zügs.

U blibet gschpannt wiä ne Flitzboge!

richtig Wiud

I wünsch nech viu Schpass

Wie findsch das?
[Total: 5 Durchschnitt: 5]

2 Biiträg zu “Haydi Rocks Remastered isch ändli da!

  1. Super, Heinze, und danke für die Links!

    1. Merci Urs. Bald gits no meh.

Was meinsch du derzuä?

Dini Mailadrässe wird nöd veröffentlicht. Bitte alli Fälder uusfülle. Merci.

Gschpannt bliibe