Veröffentlicht schriib öppis derzuä

Jubiläum 21 Jahre

Vögi alias Haydi anno 1998

S’chunt scho guät oder wenigschtens so ähnlich.

Anderi jublet Jubiläe wiä 50 Jaar Woodstock. Loset diä zuegänermasse geile Songs us dere Ziit und kiffet oder dröhnet sich suschd irgendwiä d’Bire voll zum sich sälber z’beschtätige wiä geil das damal alles gsy söll sy.

S’Dütschland git’s waarschinlig dänn bald 30 Jahre Mauerfall moderiärt und mit gränzelos dumme Schprüch bedacht vo irgendeme Ploderi wiä am Thomas Gottschalk oder vom Dieter Bohlen oder sogar vom Andy Borg (chunnt eh nöd gross drufaa).

Ich fiire liäber s’21jäärige Jubiläum vo minere erschte CD
woni dank em Gogo Frei han dörfe mache. Ich schtell si nach ere lengere Pause wieder online und vertrieb si uff dä üäbliche „soziale“ Kanäl. Woni diä CD wider mal duregloset han, isch mer übrigens uffgfalle, dass sich eigetly 21 laaaangi Jaar nüt g’änderet hätt. Oder es isch mer mindeschtens nöd ufgfalle. Uff jede Fall isch diä CD jez au Senirock.

Viel Spass bim Inelose und Mitfiire vo mim 21jährige Jubiläum! Au wänns zum Teil truurigi Liäder sind.

Keep on rockin in a free World!
S’Hindere müend mer Schtand hüt (leider) eifach mal schtriche.

Wie findsch das?
[Total: 4 Durchschnitt: 4.8]
Veröffentlicht schriib öppis derzuä

Bockwürscht und Nordliächter

Bockwurst

Eigetly woni scho sit bald 20 Jaar s’Dütschland und bin mit ere dütsche Frau us em Norde verhüratet. Vo det her würdi meine, dass i äs einigermasse pflägts Schriftdütsch rede.
Ich mag au diä ganze Schwiizer nöd, wo mit irem Schwyzerdütsch oder neudütsch ire Swissness s’Dütschland karisiäret: „Wissen sie ich bin aus der Schweiz, und das ischd alles ganz neu für mich und überhaupt. Können sie mir doch bitte sagen, wie das bei Ihnen in Deutschland ist und wie das funktioniert“.

S’letscht Jaar isch mer aber öppis grausams passiärt. Ich bin s’Rostock gsi und han amene Schtrandkiosk in Warnemünde dummerwiis gseit: „Guten Tag ich hätte gerne eine Bockwurst, bitte“.
Und was hätt d’Verkäuferin gseit? „Sind sie aus der Schweiz?“
Ich bin einigermasse schockiärt gsy, dass sie das sofort tschäggt hätt. Aber ich bin i mich gange und han mer überleyt, was i falsch gmacht chönti ha.

Fäler 1:
Dä verdammti Konjunktiv vom Schwiizerdütsche. „Ich hätte gerne“ bruchts überhaupt nöd. Höchschtens na „Bitte“. Aber sogar das chan z’lang sii. Chönntet si mir, wär’s ine möglich, würdet si, dörf ich si bitte, äs chönnti, ich dänk äs wär und das ganze Zügs funktioniert in Norddütschland definitiv nöd, und entlarvt de Schprächer als Aaghörige vomene chlyne, sich sälber überbewertende Bärgvolch.

Fäler 2:
Satzlengi. Hanis doch tatsächlich gschafft, 8 Wörtli na mit Komma z’underteile. Das isch definitiv ehnder Jodelkultur als diräkti Kommunikation.

Fäler 3:
Mangelndi Coolness. Eigetly wär diä korräkt Antwort uff „Sind sie aus der Schweiz?“ gsy
„Aus Güstrow da sprechen wir so“.

Ich han dänn es Jaar lang g’üäbt diä Bschtellig schprachlich korräkt ufzgää, mit Ratschläg vo dä Frau und Tonbandtraining. Schtolz bin i geschter wider an genau gliche Kiosk zu dä gliche Verchäuferin und han gseyt.

„Moin, eine Bockwurst“.

Und was isch als Antwort cho?

„Sie sind doch der Herr aus der Schweiz, der jedes Jahr wiederkommt!“.

Moral: Du chasch bi Jedem und Jedere blöffe und eifach öppis vormache, aber niä und würkli gar niä bi nere Schtrandkioskverchäuferin.

Wie findsch das?
[Total: 9 Durchschnitt: 4.8]
Veröffentlicht schriib öppis derzuä

En Blues für die arm Schwiizer Bevölkerig

Illustration: Sleepy Officer

wo s’Dütschland iichaufe muäss, wills doch i dä Schwiiz vill z’tüür isch. Det händ d’Verchäufer ja en einigermasse aaschtändige Lohn.

Und natürli für all die arme agschtellte Zöllner und Hilfszöllner vom Schwabezoll wo Tag und Nacht i nöd klimatisiärte Rüüm bi süttiger Summerhitz abwächsligswiis mit Affechelti im Akkord diä verdammte Uusfuärschtämpel uff d’Kassezättel vo däm Bärgvolch druffhauet dermit’s diä hochverdiänti dütschi Umsatzschtüür zruggkriägt.

Än Tschobb, wo übrigens gar kän Rock’n’Roll isch.




Wie findsch das?
[Total: 9 Durchschnitt: 4.9]
Veröffentlicht 2 Biträäg

Uups na vergässe

diä wahri Königin vom Rock i dä Neuziit

und natürli Trottinett mit dä sagehafte Moni Schär. I trou mer zuä, us emene Chörli i beliäbiger Grössi usezlose, ob d’Moni mitsingt oder äbe nid. S’erschte tönt so schön monig und bim Zwöite fählt irgend öppis, Und Wiä!

Früächer zu alte Ziite hett das übrigens au d’Root Lee so schön anebracht (da hätts dänn eifach rootlig tönt). Aber sie ziärt sich es bizzli. Schriibet ire das si wider mal singe söll, wänn sie scho dä Bass nüme virtuos wott bediäne.

Und überhaupt. Use zum zweite Juni…

Wie findsch das?
[Total: 2 Durchschnitt: 4.5]
Veröffentlicht schriib öppis derzuä

Äs Wägwärfgedicht

Uss gegäbenem Aalass. Wird am beschte im drü Viärteltakt gsunge.

Dä Ueli gaat zum Trampi uff Amerika
Und fiiret Friendschipp wo’s tünd haa
Beid sind für ä langi Muur
Bim Trampi wärs dänn Mexiko
Bim Ueli wärs Hiiwil doch nur
Doch wänn en öppert froged
Ueli was meinsch denn du dr’zuä
dänn meinte er nur ganz schnäll

Ei känn nossing sey tu siss ischu

Wie findsch das?
[Total: 2 Durchschnitt: 4.5]
Veröffentlicht schriib öppis derzuä

Wieder mal

Amene eigetly schöne Ort wo aber au e chly am Arsch vo dä Wält isch.

Aber wahre Rock’n’Roll isch das nöd.

Wie findsch das?
[Total: 2 Durchschnitt: 3.5]
Veröffentlicht schriib öppis derzuä

haydi.rocks git’s ezz (faschd) überall

Dank em guäte Job vo mim Vertrieb http://dittomusic.com git’s mini Liäder jez eigetly uff dä meischte Plattforme.

Spotify
Äppel Music (iTunes)
Amazon
Google Music
Napster
Deezer
YouTube

und no äs paar Anderi. ….

Uff Soundcloud hani das Ganze scho vorgeschter ufeglade.

Und uf mx3.ch isch äs natürli au druff.

Wie findsch das?
[Total: 4 Durchschnitt: 5]
Veröffentlicht 2 Biträäg

Bald isch es gschafft

So. Mis Projäkt isch sozsäge i de letschte Züüge vor äm Going Publik.

Aagfange hätt das Ganze im Februar 2018 wo klar worde isch, dass i inere Altherrekapälle als Bassischt unerwünscht bin, will i ebe na vill älter als die Altherre bin und sich diä drum ä Zukuänft mit mir nöd händ chöne vorschtelle.

Druffabe hätt mi en kreative Aff bisse und ich bi wider hinter Gitarre, Schnurregiige und Bass und han aagfange üäbe. Dänn isch es um s’ufnää gange und ich han dänkt: „Das chan i au“. Han mer drum bi Amazon und Ebay Miks, Kopfhörer und äs chlyses Mischpult zämetünterlet. Inschtrumänt sind zum Glück immer no mee als gnuäg im Chäller umegläge.

Täggscht sind mer eigetly liächt us dä Hand oder em Hirni gflosse. Wichtig für mich, ich wott niämert beleidige und kei Schtellig i dä höche Politik beziä und ha derfür meh als gnuäg Gründ. Am liäbschte tueni wirri luschtigi Gschichtli verzelle, dass mach i bim Brottschobb übrigens au.

Äh jo. Und en neue Läppi han i au bruucht. Mit alte Kömpi hettis leischtigmässig zwar no taa, aber wäni öppis uufgnaa han, hätt me eigetly nöd vill ghört usser däm verdammt luute Lüfter vo dere Chischte.

Software irgendwiä zuägleyt. Bi mir isch es Audacity. Erschtens frei und zweitens massgschniideret uff mini Arbeswiis. Ich liäb’s, zwänzg Kanäl uffznäh und dänn wider useschmeisse und uff’s Wesentliche z’reduziäre.

Mal paar Tracks uufgnaa. Eigetly hani vill me Songs aber irgendwänn muäss me au mal schtoppe will fertig isch definitiv niä öppis.

Webtechnologiä sind mer eigetly nöd främd, aber trotzdäm hani mi wider ischaffe müässe und mi sälber au frooge wäg all dene verdammte Tschännels uff Souschel Miidia. Ich han mal diä uusgwäält, woni s’Gfüül han, dass is halbwägs blicke. Da hani aifach druff gluägt, dass das Zügs technisch einigermasse suuber iibunde isch. Immerhin isch d’Website ezz so iigrichtät, dass me chan Feedback gää wänn me dänn wott, sozsäge „OPEN HAYDI“.

Ezz isch es Huäregopfertamisiäch scho anderthalb Jaar här und das Zügs sött ändlich veröffentlicht wärde, susch bringts jo gar nüt.

Was fählt na zum würkliche Release?

Dä Vertrag dass mini Songs bi dä meischte Musigabüüter erhältlich sind. Es gseet drna uus, dass min Verlag äs bitzli schlampet.

D’Amäldig bi dä SUISA. Das liit definitiv a mir willi äntli äs Passfoti und d’Formular schicke müässt.

Ich warte mal gschpannt uff die nöchschte Tääg.

Wie findsch das?
[Total: 2 Durchschnitt: 4.5]
Veröffentlicht schriib öppis derzuä

Ich bruche no mee…

Bim Baschtle a dere Siite hani gmerkt, dass i gar nöd so vill Material über mich und mini ehemalige Mitschtriiter han. Eigetly verdammt wenig zum das so z’säge.

Drum wäri schüüli froh, wänn äs paar guäti Seele mir Material für diä Website chönntet schicke.

Konkret:

Ziitigsartikel wo öppis mit mir und mim Umfäld z’tuä händ (WahWah, Gasseblatt, Gasseblues, Stilett, NZZ, TA, WoZ).

Demo und Übigsruumtapes woni irgendwiä mitmache.

Livetapes und so Züügs.

Zeichnige vom geniale Paul Weixler.

Eifach maile oder so.

Merci

haydi.rocks

Wie findsch das?
[Total: 2 Durchschnitt: 5]