Gschicht

Da zunderscht gits mini Songs zum Streame oder zum Download. Wänn du mee über mich wüsse willsch, schneugisch eifach echly uff minere Siite ume, oder du chasch au Frage schtelle. Im Blog schribi mängischd Aktuells zu mir, oder zu Sache wo mer irgendwiä uuffalled.

Jetzt wirds äs bitzeli schwierig. Also wänn ers unbedingt wänd trotzdäm en churze pseudogschichtliche Abriss zu dä „Karriere“ vo HAYDI.ROCKS.
Gebore worde isch dä Haydi als Heinz Vogelsanger irgendwänn im Jahr 1957 zmitt’s in Züri beziähigswis im Unischpital Züri mitaschlüssendem Wohnsitz in Züri-Wiädike. Eigentlich isch är zweischprachig uufgwachse (s’Müeti ä Bärnere und dä Bappi irgendöppis zwüsche Schaffhuuse und Züri). Drum meint er bis hüt, är chön au bärndütschi Liäder mache.
Är isch dänn in Chindsgi, wo’s en innerhalb vore Wuche vom Bärndütsche kuriert händ, will das gat ja s’Züri eifach nöd und är isch i Rekordziit uff es pflägts Züritütsch umgschtige. Aaschlüssend hätt er Primarschuäl gmacht isch ir Schuäl meischtens guät und bim Tschutte ä Fläsche gsy. Das hätt en scho chly möge. Sini Eltere händ peinlichscht druff gluägt, dass er sich au als Einzelchind a gsellschafltiche Aaläss beteiligt, drum isch er aktiv i dä Chile, bi dä Pfadi und dä Schtadtjugendmusik gsy und hätt döt mit unterschiedlichem Erfolg Klarinette gschpillt.
S’Wiädike isch de Platz ir Wonig knapp gsy, derfür hätts Umfäld gschtumme, Zäme mit sinere erschte Liäbi, de Carmen hätt er Chöigummiautomate knackt. Im Halunkewäldli uff em Schuälwäg hätt me sich gägesitig uff dä Grind chöne haue, je nach aktueller Konschtellation dene oder au dä Andere.

Umso schockierender isch es für en dänn gsy vo Wiädike uff Albisriäde umsziä. Plötzlich inere „günschtige Gnosseschaftswonig“ diä ganz Sidlig voll vo Bünzlis und Aagschtellte, alles brav und nüt me wild. Ah jo: Und do hetts no wisäwi uff dä Schtrass dä Kuafför Heller gää. Das isch de wo immer en Chachelischnitt gmacht hett und wänn denn i’d Schuäl gange bisch, händ all luut glacht: „Aha, bisch bim Heller gsii“.

Er hätt sich dänn duregmischlet bis zur Konfirmation und hätt dänn aalässlich vo däm Fiirtig tatsächlich ä (billigi) Gitarre gschänkt kriägt. Drei Mönet nach dä Konfirmation isch er übrigens us dä Chile uusträte.
D’Gitarre hätt en mee inträssiärt aber er isch über äs Jaar wiä nen Hornochs dervo ghockt und hät nöd gwüss was er demit aafange söll. Zum Glück isch er scho zu dere Ziit a dä Zürcher Riviera umeghängt und hätt det de Pius känneglernt, wonem mal äs paar Grundakkörd biibracht hätt. So grüschtet hätt er dänn diä erschte Liädli zur Gitarre chöne schrummle, wiä „house of the rising sun“ oder Bob Dylan Schinke. Und will er au by Fraue hätt wele aachoo hät das natüürli bsunders schön töne müässe. Da hätts dän en zimliche Wettbewärb gee, wär das am Beschte bringt

Mit achtzäni hätt er dänn die erschti Bänd gha. Diä hätt sich ARNOLD WINKELRIED gnännt. Waarschiinlich chämti bi dem Name hützutags scho irgend en Deppe Nationalismus- oder Patriotismus Vorwurf. Das isch aber definitiv nöd so gmeint gsy, sonder eigety nur für konsequänt durezogene heldehafte Hardrock gschtande. Leider händ diä nur ein Gig gha, wo dr’Haydi a dä Rütmusgitarre zudem än totale Hangover vo wäge Pastis gha hät. Will er zudäm i dere Ziit aagfange hätt, uff politischi Apologete z’lose isch er uss dere Bänd usgschtige.

Är isch dänn wider umgschtige uff akustischi Gitarre und hät mit falscher Schtimme und voller Gefüüle Liäder gmacht, inschpiriärt vom Ärnschd Born und vor allem vom Tommy und vo Klaus der Geiger us Münche. Ä paaarne hätts g’falle was er so mach . Tonkonsärve vo dänn git’s leider nüme aber me chan beruhigä. Äs isch kän grosse Verluscht für d’Mänschheit.

1976 Äs nöis Ziitalter fangt a. Punk, Damned, Clash, Nasal Boys, Shame 69, Sex Pistols. Äntlich chan me im Gägesatz zu Hippie Tripie Vibes ä Bänd mache, oni dass me 157000 Akkörd i dä erschte, zweite und dritte Umcheerig leere muäss. Äs gaat los mit em diräkte musiziäre.

Ratz vlnr. Stella Brunner, Paul Weixler, Urs Morf, Haydi, Adi Strickler

1978 Nach umeschrummle dörf dä Haydi äntlich inere Richtige Bänd iischtige. Bi de geniale Ratz mit em beschte Songtäggschter vo dä Schwiiz, em Paul Weixler. Und natürli mit em Urs Morf, äm Adi Strickler und dä Stella Glitter. Diä händ rächt vill Konzärt gschpillt au zäme mit em Showdown Theater. Leider händ sich d’Ratze nach anderthalb Jaar us verschidenä Gründ uufglöst. Villicht händs es zwenig gschätzt, was am Paul als Frontmänsch gha händ.

1979 Dä Haydi hätt d’Band Abschturtz zäme mit dä Stella Glitter und em Sven Glückspilz gründet. Konzärt i dä ganze Schwiiz. D’Täggscht sind ezz vo Allne gschribe worde. Ein Song (Sabotage Boogie) hätt’s dänn es Jaahr schpöter i d’Tagespräss gschafft und isch det als Vorbote vo dä Unruähe vo dä 80er Bewegig s’Züri präsentiärt worde. Deby isch es dett eigetly nur im dä Luschtgwünn gange, wänn me öppis kaputtmacht. Mängisch wird halt au en chlyne Furz relativ höch bewärtet.

1980 händ sich dänn d’Abschturtz zwangsuffglöst, will eis Bändmitglied es mehrjährigs Zwangspraktikum im Schtaatsdiänscht hätt müässe mache. Bewegti 80er Jaar in Züri mit ganz vile Bands. Am beschte ghalte und bis jetzt aktiv sind diä blibe, wo straighte Punk Rock oni soziopolitisches drumumegebabbel gmacht händ, zum Biischpiil de bis jez geniali Räms mit de BUCKS.

1981 hätt de Haydi d’Schnauze voll gha vo Woonexperimänt und hätt sech uff’s Private zrugggzoge. Äs möbiliärts Appartementzimmer z’mitts im Niederdorf isch d’Löösig gsy. Alkis, Proschtituierti und Barmaids als (aagnämi) Nachbaarschaft. Mängisch hätts zmitt’s i dä Nacht Lämpe gää, gross gschtört hätt das niämert. Und natürlich immer d’Ländlermusig bis am morge am zwei us dä gägenüberliegende Bierhalle Wolf. Pünktlich jede Morgä am zwei händ sy dänn „So ein Tag so wunderschön wie heute“ gschpillt und dänn isch zwar diä musikalisch Show verby gsii, nöd aber nöd diä vo dene wo usegschtellt worde sind und promilletränkt ire Liäbeschummer, Wältschmerz und Verbesserigsidee für d’Organisation vom ganze Kosmos dä Niederdorfschtrass mitteilt händ.

Irgendwänn im Summer hätt er dänn au mal are Session mitgsunge. Äs paar händ das ghört und händ en dänn als Sänger für iri Band EINSATZ 117 aaghüret. En Teil vo dene Songs isch uff Änglisch drum isch diä korräkt Aawändig vo Tii Eytsch und so im Vordergrund gschtande. Immerhin häts paar Gigs a Open Airs und in Jugendhüser gää. Mit em Schtächöpfel Verlag isch au än Tonträger i Form vonere Kassette produziärt worde (hüt ä gsuächti Rarität). Diä Band hätt bis Härbscht 1982 dureghebt, nachher hätt sich de Haydi vo dene Jungs trännt oder umgekehrt, sie händ schpöter nomal ein Gig gmacht und sind dänn i Vergässeheit graate. Isch villicht au besser so gsy.

1983 Reisezit. Dä Haydi isch uff Zentralamerika und hätt sich dört mit andere Traveller duregschlage. Im Härbscht 1983 isch er dänn heychoo und d’Stella, Gitarischtin vo Abschturtz isch i de Zwüscheziit vom drüjäärige Schtaatdsdiänscht zrugg gsy. Mit em Hainz Rohrer und em Olivier Money händs d’Band COMPLETE ENCHANTER gründet. Bi Konzärt isch amigs dä beschti Hard Rock Gitarrischt und Techniker, dä Shüfi Disarea us em Züri Oberland mitchoo.

COMPLETE ENCHANTER händ en höche Aaschpruch a sich sälber und as Publikum gha. Dä Sound verworre, dä Aaschpruch hochpolitisch und alles irgendwiä immer huäregopfertamisiäch kompliziärt. Da dra isch dä Haydi allerdings au nöd unbeteiliget gsy. Trotzdäm oder vilicht grad drum händ sie ziimlich vill Konzärt gmacht au zämä mit dä SARA RÖBEN. Als Highlight im Summer 1986 ä Tournee dur d’Schwiiz, Frankriich und Italie zäme mit THE EX us Amschterdam NL.

Dernäbe hätt er dank dä Unterschtützig vom Dieter Stemle au mehreri Uuftritt in i verschidene agseite Lokal in Züri als VÖGI SOLO gha.

Complete Enchanter vlnr. Olivier Monney, Haydi, Stella Brunner, Hainz Roarer

1990 hätts dänn d’Band CASH’N’RUN gää mit äm Dominik Müller, dä Diana Zucca und äm Adi Strickler. Schpöter isch dänn d’Marlies Egger für d’Diana und dä Adi i dä Band iigschtige. Dank dä Marlies hätt er dänn faschd zäh Jaar im Choschthus in Rupperswil gwont. Immer no kai Website bis hüt vom Choschthus mit guätem Grund. Wer verrätscht scho äs Paradies im Internet?
Konzärt im Grossraum vo Züri bis Aarau und zwei Demokassettli (Kassette sind übrigens so rächteggigi Dinger wo me ines Gröt inegschobe und dänn irgendwiä tönt hend) -> Recherche im Internet hilft.

1992 isch er dänn vom Gogo Frei gfrogt worde, ob er zäme mit em Tschändu Muhmenthaler, em Schübling Kyburz und em Üse Dubach bi de ROCKFLAMES würd mitschpile. Das Ganze isch guät cho und är hät au na i andre Projäkt vom Gogo mitgschpillt, teils Bass und teils Gitarre. Senisationelli Konzärt i Mehrzwäckhalle, i Beize a Huusfäschter und a Hundsverlochete. Uuftritt mit em Gogo, em unvergässliche Jelly Pastorini und em Krimiautor, Huusmaa und Meischter vo dä Falsettstimm Wolfgang Bölke Bortlik.

Haydi Rockflames
Rockflames vlnr. Schübling Kyburz, Gogo Frei, Haydi, Tschändu Muhmenthaler, Üse Dubach

1998 isch ä Solo CD VÖGI mit lieder vom Haydi, damals ebe Vögi entschtande. Mitgschpillt händ sini Kumpels vo dä Rockflames und dä Rene Kopetschny am Sax. All Liäder in abgschwächtem und do dermit aargaufähigem Züritütsch. Erschine uff em Gogo sim Label und vertribe über dä Ticket-Versand. Äs paar vo dene CD’s schtaubed immer no imene Chällerruum vor sich hi, und wäret uff Nachfraag erhältlich.

1999-2000 nüd würkli Wichtigs

2001 für äs Huusfäscht än ACDC Coverband mit em Haydi a dä Gitarre.

2002 Hürat mit dä Frau Hayduk, de Vögi wächslet jetzt de Name uff Haydi.

2003 bis 2017 älter werde, Gäld verdiäne und verlüüre, schpiässig wärde, zwüschedure abschtürze, Jöbs suäche und wider loswärde, pflägti Feriä oder so, s’glyche was Millione und Milliarde Anderi mached demzufolg ehnder unwichtig.

Und wänns extrem wichtigi Sache i dere Ziit gäh hetti, blibed di do prIvat.

2017 Dä Haydi fangt wider a Täggscht s’schriibe wo äs paar guäti Feee na kuul findet. Er fühlt sich gschmeichlet. Zudem bewirbt er sich binere traditionelle Zollkapelle für dä Bassjob, wird dett aber abglehnt will er aifach scho z’alt derfür seg. Jetzt sticht’s en aber erscht richtig.

HAYDI.ROCKS ISCH S’LÄBE VOR EM TOD!!!

AMEN

Wieder nach obe.

Wie findsch das?
[Total: 10 Durchschnitt: 4.7]
Was meinsch du derzuä?

Dini Mailadrässe wird nöd veröffentlicht. Diä nötige Fälder sind mit * markiert.