letschti bini i wider s’Dütschland gsy
und dött im Aldi chaufen i
vill vo dene Tetrapack mit em guäte wisse Wii
Truube us EU, liäblich im Gschmack
isch was uff de Verpackig schtaat
dä Wii schmöckt süffig und nöd schwär
s’liäblich chunnt vom Zucker här
Sulfit hätts din für en guäte Zwäck
niä verdirbt er s‘isch immer perfäkt
eis füfzg für füfzäh Dezi isch de Priis
da scheitred s’Suffä nöd am Gäld, da sind si nöd so fies
Bi däm Schtoff da schtimmt d’Chemie
i chan devo no so soviel trinke, en Kater han i niä
I gange hei und trink dä Wii vom Aldi
hani gnuäg trunkä jo denn schlof i bald i
was i suschd han wele mache ja das lani halt sii
bim ene guäte Schlückli Wii vom Aldi
Am Mäntigmorge chumi i dä Bude aa
dä Scheff wo suscht niä da isch schtaat scho daa
und är seit zu mir i bin so frey
und produziäre nume na i dä Türkey
und logisch du bisch au betroffe
i zwei Mönet isch din Tschobb dänn gloffe
I säg i gang jez hei und trink dä Wii vom Aldi
hani gnuäg trunkä jo denn schlof i bald i
für di no lenger schaffä jo das lani halt sii
bim ene guäte Glesli Wii vom Aldi
Am Zischtigabig Znacht mit dä Madeleine
Sie findt mich kuul, ich find sie wunderschöön
mer trinket zäme nonemal äs Bier
Doch I wetti meh vo Ihr als si vo mir
Jez muäss i truurig heigaa trink dä Wii vom Aldi
hani gnuäg trunkä jo denn schlof i bald i
chan nüt derfür dass ich in dich verknallt bi
zum s’überschtaa da bruchts en guäte Schluck vom Aldi
Überall da machet Lüüt mich aa
diräkt im Real Life und uff Souschel Miidia
Ich söll politisch Schtellig nää
das machi hütt ja jede und ich söll drum au es Steitment gää
Ich han ä Meinig zu faschd allem doch eis isch für mich klar
Ich tauge nüt zum d’Wält verändere und ganz nüt als Missionar
Zum Glück han ich dihey no massig Wii vom Aldi
hani gnuäg trunkä jo denn schlof i bald i
ich bin kän Wältverbessrer, Steitmentposter glaub’s mir
mir proschtet liäber mit nem guäte Schluck vom Aldi
